🚫 اكتشاف مانع الإعلانات

أهلا يا أصدقاء

بحمدالله وفضله رزقت بمولودة مع مطلع العيد،

اسميناها تالا،

وبما أني الآن ومع تكرر التجربة صرت أكثر خبرة في احتياجات الأطفال من المرة الماضية أعتقد أنه من المناسب كتابة تدوينة جديدة ألخص فيها احتياجات الطفل للأربعة أشهر الأولى من حياته ..

الأشياء اللي استخدمتها سابقاً مازلت أعتقد أنها من الأساسيات ، لكن فيه بعض الأغراض أحب أضيفها للقائمة لأنها سهلت علي كثير من الأمور وبعض الأغراض استبدلتها بأفكار أكثر عملية منها..

وايضاً مازلت عند رأيي السابق في الاقتصار على الأمور المهمة فقط ،

أحب أستغني عن الاشياء اللي ما أحتاجها كثير، مثلا ما أشوف له داعي يكون عندي الزبالة الخاصة بالحفاضات اللي تعزل الرائحة او جهاز خاص لتدفئة المسحات الخاصة بالنظافة .. اشياء مثل هذي أعتبرها ثانوية واستخدامها مايتجاوز كم شهر فأفضل استغني عنها ..

بأرتب الأغراض حسب احتياجات المولود الأربعة (النوم، الغذاء، النظافة، الدفء)

أولاً : النوم

سرير البيبي

هذه المرة ما اشتريت السرير الصغير الخاص بمرحلة الأشهر الأولى ،

اكتفيت بنفس سرير ريان الكبير بما انه متوفر ،

أخذت السرير من والمارت ..

(وبالمناسبة، كل كلمة أضع تحتها خط يمكنك الضغط عليها بتوصلك بصفحة المنتج)

لكن أزلت أحد الحواجز الخاصة بالسرير فصار كأنه جزء من سريري ، وجدا جدا ريحني أكثر من السرير الصغير، لأني ما أحتاج أقوم وأنقل طفلتي من سريري لسريرها، أقدر أنقلها وأنا مستلقية على السرير بدون ماتحس بتغير المكان أو البعد عني،

وهذا مفيد للأم اللي ترضع رضاعة طبيعية بالذات لأنه كثير نقوم بنص الليل نرضع البيبي ولازم نرجعه مكانه ومانخليه ينام جنبنا لأنه خطر ينكتم ، طبعاً صعب انك تكونين مصحصحه بنص الليل لكن حاولوا تنتبهون لهالنقطة، والسريرين بهالشكل المفتوح على بعض يساعد كثير من هالناحية ..

الأمر الثاني المهم وضعه بالاعتبار انه من الجيد أن الطفل يتعود من البداية على سريره اللي بيكبر فيه لأنه بعد الثلاثة أو الاربعة أشهر بيكون السرير الصغير غير صالح للطفل وبالتالي بنحتاج نعود الطفل ينام في سرير جديد ومرتبه جديده وهالعمر قد ما يتقبل التغيير والمرتبة الجديدة ويتغير عليه الجو فيتعبك في النوم على مايتعود على الوضع الجديد..

ولأني حطيت سرير البيبي ملاصق لسريري ماصار عندي مكان لطاولة جانبية

فحطيت حاويتين كرتونية لبعض الأغراض اللي أستخدمها بشكل يومي وأحتاجها تكون قريبة ، وهذا وضع مؤقت لحد ما يصير البيبي ينقلب، وقتها لازم أشيل كل شي من السرير ..

ممكن أنتم تحطون الأغراض بأي طريقة تفضلونها، المهم إذا بتخلون شي في السرير ضروري يكون مو حاد أو يسبب خطر مثل الاسلاك وغيرها كلها ثبتوها بأي طريقة خلف السرير ..

والبعض يفضل يشتري منظم خاص بالأغراض اللي يحتاجها حوله والمنظمات تتعلق على طرف السرير، حلوه الفكرة خاصة بعد مايكبر الطفل ويصير ممكن يتحرك أو ينقلب ماينفع يكون حوله أي غرض، بعض المنظمات حجمها كبير وبعضها صغير موجود منها أنواع و أشكال في هالرابط

الأشياء اللي أحتاجها شخصياً : أبجورة من النوع الخافت وكاميرا المراقبة، وفي الثانية بعض الأغراض المتفرقة مثل منظف الأنف والمصاصة ودوا الغازات و لي قناع العيون للنوم وكريم مرطب..

الهزازة أو الجلاسة

Graco DuetSoothe Swing

اخترت الجلاسة أو الـ swing بعد بحث وتفكير لأنها من أهم الأغراض اللي تساعد الطفل على الهدوء والنوم،

خاصة الأطفال اللي يعانون من مغص في البطن صعب عليهم ينامون بسهولة على السرير المسطح بالذات بعد الرضاعة مباشرة، فممكن نستعين بالجلاسة للتهدئة والتنويم وبعدها ننقل الطفل للسرير، أو نستخدمها وقت مايكون الطفل مستيقظ حتى مايتعود على انك طول الوقت شايلته ويتعبك..

لكن ما ينصح انك تشغلين وضع الهز لساعات طويلة ، قرأت مره أنه الأفضل مايتجاوز ساعة لساعتين خلال اليوم كله..

المعايير المهمه عندي باختيار الجلاسة انها تكون :

أولا مريحة وآمنة ، فتخطيت الأنواع اللي يكون قماشها خفيف او شكلها مو قوي ..

الأمر الثاني انها تكون سهلة التنقل،

لأن الجلاسة من الأشياء اللي أحب أنقلها معي مره ابيها في الصالة ومرة بغرفة النوم ومره عند مكتبي وغيرها من الأماكن فمهم تكون سهلة علي اني ارفعها واوديها لأي مكان،

وطبعا صعب أحصل جلاسة سهل أنقلها وبنفس الوقت تكون متينة وقوية..

لقيت هذا النظام من الجلاسات اللي تكون قابلة للانفصال، وحبيت الفكرة ،

احسن شي فيها ان الجلاسة تنفصل عن الحامل اللي فيه الهزاز فيصير سهل علي نقلها من مكان لمكان بدون الحامل اللي فيه خيار الهز والأصوات ..

ميزة اخرى انها فيها خيار التوصيل بالكهرب ، يعني مو معتمده على البطاريات فقط مثل كثير من الجلاسات،

لأن الجلاسة اللي كانت عندي سابقاً كانت معتمده على البطارية وتخلص البطارية أو تضعف بسرعة وتصير ماتهز بالشكل المطلوب وهات البطارية رد البطارية وآخر شي أهز بيدي!

الجلاسة فيها وضعيتين للهز يمين ويسار أو ورا وقدام .. وطبعاً فيها سبيكر اصوات طبيعة ونغمات ، والجلاسة إذا انفصلت عن الحامل الخاص بالتأرجح ، فيها خيار الهز (مو أرجحه بس هز مثل هز الجوال)..

بالنسبة لحجمها ، الجلاسة نفسها مو كبيرة مره ، بس الحامل اللي يمرجحها كبير، يعني تعتبر ككل من الأنواع الكبيرة ، وأعتقد واضح من الصوره الحجم..

الشي اللي ما أعجبني فيها ان المقعد مايجلس بزاوية قائمة يعني وضع منسدح ووضع مرتفع بزاويه مايله مافيه وضع جلوس مستقيم ، وأظن وضعية الجلوس ممتازة للاطفال الاكبر سن حتى يقدرون يجلسون فيها وقت الوجبات غير وقت الرضاعة.. يعني اللي فوق عمر ٦ شهور أتوقع بيطفشون من وضعية شبه الانسداح، لكن ممكن وقتها أكتفي بكرسي الأكل ،مابعد جربتها لهالمرحلة ..

لكن بالنسبة لمرحله الستة أشهر الأولى أرى انها ممتازه وتسكت البيبي ومريحة.. وبعد هالعمر بتكون للتهدئة والتنويم ، الجلاسه هذي تحديداً مناسبة لحد مايصير وزن البيبي ١٢ كيلو ..

وكل شخص يبحث ويشوف ايش المهم عنده في الجلاسة من كل النواحي ويختار على أساسها ..

وعلى فكرة ، الدباديب مايدورون بس كذا معلقين .. وتشتغل خط ١١٠ أو ٢٢٠

كاميرا المراقبة

Amcrest ProHD 1080P

الكاميرا جدا مهمه، ماكنت مقتنيتها سابقا فكنت أقلق على ريان وهو نايم كل كم دقيقه اروح للغرفة أشيك عليه يتنفس ومرتاح والا لا ، وأحيانا اذا فتحت الباب ودخلت يحس بالحركة ويقوم من النوم، لكن بالكاميرا مررره ارتحت نفسيا صرت اترك تالا تنام واطلع برا الغرفة أشتغل بأي شي وأشغل الكاميرا عليها واكون مراقبة حركتها ومتطمنة لوضعها طول ما أنا برا الغرفة..

اخترت هالكاميرا بالذات لأن تقييمها عالي وفيها ميزات حلوه وسعرها مناسب بالمقارنة مع بعض الكاميرات الأخرى..

باختصار ، فيها إمكانية التحكم عن بعد بتحريك الكاميرا وفيها زوم ومايكروفون وسماعات بحيث اقدر اتكلم مع اللي عند الكاميرا ، وفيها رؤية ليلية واضحة وممتازة وجودة التصوير عالية مقارنة بباقي الكاميرات ومصنفة من أفضل كاميرات المراقبة..

والمراقبة تكون عن طريق الجوال او الكمبيوتر ومجانية، وممكن تدخلين للكاميرا من أي مكان فيه نت سواء قريب أو في مدينة ثانيه..

أيضا فيها خيار الحفظ ، ندخل فيها كرت وتصير تسجل وتحتفظ بالتسجيل أو تسجل وترفعه عن طريق كلاود ، وهالخيار مفيد في حالة وجود خادمات مع الأطفال حتى تكونون متطمنين عليهم لو حبيتو ترجعون تشوفون التسجيل خلال اليوم كامل ..

الشي الوحيد اللي ما اعجبني هو ان الوضع الليلي يشتغل تلقائياً ، فإذا الاضاءة خافته بدرجة معينة احيانا يشتغل ليلي بعدين يقلب عادي وبعدين يتشتغل ليلي كأن الكاميرا مو عارفه تحدد الوضع ليل والا نهار ، وهذا يحدث إذا فتحت أبجوره خافته جدا ..

لكن هل هالكاميرا هي الأفضل أو نيست وغيرها من الكاميرات؟

بما أني ماجربت الا هي ماقدر أقارن ، اللي أقدر أقوله انها تقوم بعملها بالشكل المطلوب وبسعر أفضل من غيرها ومن خلال قراءتي للمميزات الكاميرات الأخرى ماتفرق هذي عنهم..

الكاميرا تشتغل خط ١١٠ أو ٢٢٠ ..

ممكن تشوفون هالرابط فيه مميزات وعيوب هالكاميرا وبعض الكاميرات الأخرى الشهيرة

ثانياً: النظافة

الملابس

أولا : مقاس نيو بورن newborn يلبس من وزن ٢ كيلو لـ ٣ ونصف كيلو .. يعني اسألي دكتورتك لو بتولدين بيبي وزنه ثلاثة ونص أو أكثر لا تاخذين هالمقاس ، روحي لمقاس من ٠-٣ مباشرة ..

اكتفيت بخمس قطع ملابس داخليه مقاس نيو بورن لون ابيض، وثلاث قطع خارجية كامله ،

ما أخذت أي شي يجي قطعتين من هالمقاس لأني أحسه مزعج لبطن البيبي اللي توه مولود انه يكون فيه شي ضاغط عليه..

باقي الملابس كلها مقاس ٠–٣ ، أغلب المواليد بيكون كبير عليهم هالمقاس شوي بس بمجرد يكملون ثلاث اربع اسابيع خلاص يكون النيو بورن ضيق..

فمافيه داعي نشتري ملابس كثيرة مقاس صغير لأننا ماراح نستفيد منها فتره طويلة .. اما مقاس ٠–٣ اشتري على كيفك الوان واشكال بيجلس الطفل كم شهر يلبس فيها..

وخلال هالفترة أنصح تعتمدين على الملابس القطن ١٠٠٪ فقط ، اتركي الكشكشات والماركات اللي بس شكل ومافيها راحة لعمر أكبر أفضل وأريح للطفل وأوفر لك..

وتذكري دائماً راحة الطفل تأتي أولا ..

~

أيضاً نحتاج قبعة أو ثنتين للرأس عن البرد خاصة أول الأسابيع بعد الاستحمام ، أغلب القبعات للأسف مقاساتها كبيره على المواليد ومفصله بطريقه ماتوصل للأذن ، فتكون مالها فايده ، فاحرصي تبحثين عن قبعه تكون طويله (عميقة) وضيقه حتى تمسك في راس البيبي وتكون على المقاس ،، بالنسبة لي استخدمت قبعه المستشفى ما حصلت أفضل منها

المهاد والبطانيات وانواعها:

اخذت مهادات نوعها يسمونه muslin swaddle خفيفة للصيف أو الأماكن الدافئة،

و مهادات دافيه يسمونها flannel Receiving Blankets

وبطانية ثقيلة ووحده خفيفة

يكفيك هالعدد بإذن الله ..

طاولة التغيير

طاولة التغيير من الأشياء اللي أعتقد الكثير يستغنون عنها مع اني أشوفها مهمه جدا ،

حلو يكون فيه مكان مخصص لتغيير الملابس والحفاضات حتى ماتتعبين وانت منحنيه على الأرض أو على السرير ويصير المكان حوسه ،

مو شرط تشترين طاولة تبديل مكلفه و مخصصه لهالغرض، أنا استخدمت طاولة رخيصة موجوده عندي سابقاً من ايكيا،

وحطيت فوقها الاسفنجة الخاصة بمكان التغيير،

وعشان يكون التغيير سهل وسريع حطيت فوق الطاولة سله بداخلها بعض الحفاضات مع كريم الاحمرار وبعض مسحات الكحول وعلبة المناديل الرطبه ..

وتحت الطاولة حطيت درج لتخزين الملابس والأغراض اللي تستخدم بشكل يومي،

اخترت درج بلاستيكي موجود مثله في محلات الكماليات، وعندنا موجود في والمارت وتارقت..

وآخر درج فيه خصصته للملابس اللي تحتاج غسل،

بحيث كل شي يكون في هالمساحة الصغيرة .. وباقي الملابس للطلعات أو الملابس اللي مقاساتها مابعد صارت مناسبة حطيتها في غرفة الملابس لأني ما أحتاجها تكون قريبة..

وفي السلة اللي تحت حطيت باقي الحفاضات والبطانيات والمهادات..

طبعاً هالطاولة عن نفسي استخدمها لحد مايصير البيبي يبدا يحبي ، بعد كذا انقل الاسفنجه على الأرض أحسه آمن أكثر لأنهم يصيرون يحبون يتحركون كثير فخطر يصيرون فمكان مرتفع..

للاستحمام

نحتاج فوطه وشامبو وزيت مرطب فقط، هالمره استغنيت عن البودرة لأني قرأت انها غير آمنه إذا تنفسوها الأطفال..

الشامبو اهم شي تتأكدون انه خالي من المواد الضارة ومصنوع من مواد طبيعية..

هالرابط فيه أفضل أنواع الشامبوات للأطفال ممكن تساعدكم على الاختيار..

وأيضا نحتاج البانيو الصغير الخاص بالبيبيات حلو ومناسب لحد عمر السنه ونص تقريبا

هذا هو النوع اللي استخدمه يجي معه قطعة قماش للمواليد مره يسهل علي المهمه ويخليني أسبح النونو بدون ما أحتاج مساعدة أحد

مقياس الحرارة

اشتريت سابقاً مقياس حرارة الأذن ، في الصورة على اليمين جدا ممتاز ، لكن الدكتور قالي انه من الولادة لعمر ٦ أشهر أحتاج أشتري مقياس الحرارة العادي اللي على اليسار لأن الدرجة الدقيقة لازم ناخذها مثل ماياخذونا المستشفى من تحت ..

لتنظيف الأنف

NoseFrida

طيب ، خلوني أقولها على بلاطه ، لأن مافيه طريقة منمقة أشرح فيها هذا الاختراع.. هذا الشي ينحط في انف البيبي ومن الجهه الثانيه ينشفط بالفم ،

صدقوني، هذي كانت اخر جملة في الحياة كنت أتوقع اني أكتبها ?

اعرف شعوركم تجاه هذي الفكرة ، لأني أول ماشفتها قلت على جثماني اشفط خشم،

بعدها في اكثر من مدونه اجنبيه ألاحظ الأمهات ينصحون فيه ويقولون انه مافيه أفضل منه لتنظيف الأنف لدرجة انه في أمازون مقيمه أكثر من ٧ آلاف شخص وهو الأفضل مبيعاً من بين منظفات الأنف، كثير يقولون جربنا كل الأنواع ولاشي ريح أطفالنا وخلاهم يتنفسون براحه وينامون مثل هذا الانبوب ،

غير كذا أنا كنت في مرحلة تجميع الأفضل تقييماً ومتحمسه اجرب أشياء جديدة، فأخذته وأنا مو واثقة تماما اني باستخدمه..

لكن جت له حاجة وصار أفضل مما تصورت، مو مقرف زي ماكنت متخيله، مافيه أي نقطة ممكن تجي للفم لأن فيه فلتر وفيه انبوب صغير مايسمح الا للهواء بالعبور..

الأطباء ينصحون به وطبيب اللي مخترعه، فأنصحكم ماتتعدونه جدا مريح وسريع وسهل وفعّال..

وآخر شي في قائمة النظافة :

فوط متعدده الاستخدام